राष्ट्रीय दुखवट्यामुळे माळेगाव यात्रेतील शासकीय कार्यक्रम 2 जानेवारी 2025 पासून

राष्ट्रीय दुखवट्यामुळे माळेगाव यात्रेतील शासकीय कार्यक्रम 2 जानेवारी 2025 पासून
—————————————-
एम.जे.न्यूज सातारा (प्रतिनिधी ) वसंत सिरसाट
—————————————-
नांदेड :- दि.28 डिसेंबर, भारताचे माजी पंतप्रधान डॉ. मनमोहन सिंह यांच्या निधनामुळे संपूर्ण देशात 26 डिसेंबर 2024 ते 1 जानेवारी 2025 ( दोन्ही दिवस पकडून ) 7 दिवसांचा दुखवटा जाहीर केला आहे. त्यामुळे 29 डिसेंबर पासून सुरु होणाऱ्या माळेगाव येथील यात्रेतील शासकीय कार्यक्रम 2 जानेवारीपासून घेण्यात येणार असल्याची माहिती जिल्हा परिषदेच्या मुख्य कार्यकारी अधिकाऱ्यांनी दिली आहे.
जिल्हा परिषदेच्या मुख्य कार्यकारी अधिकारी मीनल करनवाल यांनी या संदर्भात आज जारी केलेल्या पत्रकामध्ये हा बदल जाहीर केला आहे.
माजी प्रधानमंत्री यांचा दुखवटा एक जानेवारीला संपल्यानंतर 2 जानेवारीपासून नियमित नियोजित कार्यक्रम नव्या वेळापत्रकानुसार होतील, असे स्पष्ट करण्यात आले आहे.
दक्षिणेतील सुप्रसिद्ध माळेगाव यात्रेतील शासकीय कार्यक्रमांचे आयोजन नांदेड जिल्हा परिषद, लोहा पंचायत समिती व माळेगाव ग्रामपंचायत मार्फत केला जाते.
*पालखी 29 डिसेंबरलाच*
तथापि, पारंपारिक पद्धतीने स्थानिक देवस्थान संस्थानमार्फत तिथीनुसार निघणारी 29 डिसेंबरची देव स्वारी व पालखीचे पूजन नियोजित वेळी म्हणजे 29 डिसेंबरला दुपारी 2:00 वाजता होणार आहे. त्यात कुठलाही बदल करण्यात आलेला नाही
*अन्य कार्यक्रम 2 जानेवारी पासून*
मात्र 29 तारखे नंतरच्या नियोजित कार्यक्रमांमध्ये बदल करण्यात आला असून आता सर्व कार्यक्रम 2 जानेवारीपासून होणार आहेत. (1 जानेवारी नंतर ) 29 तारखेपासून यात्रा नियमित सुरू असेल. मात्र जिल्हा प्रशासनामार्फत आयोजित काही कार्यक्रमांमध्ये उलटफेर करण्यात आला आहे.
*2 जानेवारीपासूनचे कार्यक्रम*
जिल्हा परिषद प्रशासनाने नव्याने जाहीर केलेल्या कार्यक्रम पत्रिकेनुसार कार्यक्रम पुढील प्रमाणे आहेत.
दि.2 जानेवारीला सकाळी 10:00 वाजता अश्व, श्वान, कुक्कुट प्रदर्शन व विविध स्पर्धांचे उद्घाटन होईल.
महिला व बालकांसाठी विविध स्पर्धा सकाळी 11:00 वाजता होतील तर दुपारी 2:00 वाजता कृषी प्रदर्शनाचे उद्घाटन व कृषी निष्ठ शेतकऱ्यांचा सत्कार होणार आहे.
*लावणी कार्यक्रम 2 जानेवारीलाच*
तर दुपारी 3:00 वाजता लावणी महोत्सवाचा कार्यक्रम होणार आहे. यापूर्वीच्या नियोजनातही लावणी महोत्सव हा 2 तारखेलाच होता. हे सर्व कार्यक्रम 2 जानेवारी रोजी एकाच दिवशी वेगवेगळ्या वेळी घेण्यात येणार आहे.
दि.3 जानेवारीला सकाळी 11:00 वाजता आरोग्य शिबिर होणार आहे. तर याच दिवशी जिल्हा परिषदे मार्फत पारंपारिक लोककला महोत्सवाचे आयोजन करण्यात आले आहे.हा कार्यक्रम दुपारी 2:00 वाजता सुरू होईल.
दि 4 जानेवारी रोजी दुपारी12:00 वाजता शंकर पटाचे ( बैल जोडी, बैलगाडा शर्यत ) आयोजित करण्यात आली आहे. दि.5 जानेवारी रोजी सकाळी 11:00 वाजता पशुप्रदर्शन व दुग्ध स्पर्धा बक्षीस वितरण समारोह होणार आहे. तर 5 जानेवारीला दुपारी 12:00 वाजता कुस्त्यांची दंगल होणार आहे.
भारताचे माजी पंतप्रधान डॉक्टर मनमोहन सिंग यांचे दि.26 डिसेंबर 2024 रोजी नवी दिल्ली येथील एम्स हॉस्पिटल मध्ये निधन झाले.
दिवंगत माजी पंतप्रधानांच्या स्मरणार्थ संपूर्ण देशात 26 डिसेंबर 2024 ते 1जानेवारी 2025 असा एकूण 7 दिवसांचा राज्य दुखवटा जाहीर करण्यात आला आहे. दुखवट्याच्या कालावधीत संपूर्ण भारतात सदर दिवशी कोणत्याही शासकीय मनोरंजनाचे कार्यक्रम आयोजित करण्यात येऊ नयेत,असे आदेश शासनाने दिले आहेत. नांदेड जिल्हाधिकाऱ्यांनीही या संदर्भात आदेश निर्गमित केले आहे.
त्यामुळे जिल्हा परिषद व पंचायत समिती स्तरावरील कार्यक्रमाचे पुनर्नियोजन करण्यात आले आहे. कार्यक्रमांच्या बदललेल्या तारखांना नागरिकांनी, भाविकांनी व श्रद्धाळूंनी लक्षात घ्यावे. राष्ट्रीय दुखवट्यानंतर होणाऱ्या कार्यक्रमांचा लाभ घ्यावा, सहभागीत्व ठेवावे, असे आवाहन जिल्हा परिषदेच्या मुख्य कार्यकारी अधिकारी मीनल करणवाल यांनी केले आहे.